NIBAM FASIG HAG WILAPAG

                                                                   INIBAM FASIG HAG WILAPAG

Ditulis oleh: Christian Walianggen, S.S

Diceritakan oleh: Federika Walianggen _ Masahangguli

 Sumber asli: https://sinarmasahangguli.wordpress.com/

Matias hahon Wanina hahon itnore inibamte Fasig[1] hag wilapag ari. Wereg lit itare Ir itnore Wam ondoko yabuk oko wilapag. Weregmente, Inamenere misig, enukte Lahasa[2] inim wilahasa. Itanoente Tenus ikni hahon, Matias hahon itno war apag ari. War apagma itare Wanina hahon itno amloho Tenus hahon itno inimte iba-iba uruk lit te wilapag.

Wereg lit itare, Ap eke yali fil etemonte Sehen halog toho eke kik wapag, etema. Ir itano weregma. Weregma. Yu, Amloho inim itano iba-iba uruk lit te Hekel sualtuk lit weregma Kik wapagmare hinehe itnore Eye ante nahun ari oho Ket seg atisimu ap ari kik wahaon ari Nakol o ulug itare Amloho itno inimte hekel sual-sual uruk lit te iba uruk lit wilapag. Weregma itare Hun itno kibaregte nohibag inim. Nohibaregte likiare Mel o ulug ibag, Hat te an ninim an nibam ibma

Lahe ha at ano ibagmare, Yu o ulug ibag. Ibagmare, Yure ibag fug. Nambirak o Ante nahun ketia seg atisimure Nahun uagma unggum angge laharuk elehente Nibam wilaruhuk o. Fobik enegte erok o ibagmare we Eleg o hofik fug o sonore we ninim lahuk o An nibam o ulug ibagma itare Yu o ulug henehe itnore ibag.

Wanina hahon itno ibareg itare we inim lahibag ari likiare, We Lahibareg itare Tahi[3] punumu etea lahibag. Malik itnore inim. Olma itano embesin o ibag ambehente Malik arire Numalik nindi o hilamin ulugte ibag. Hilamin ibareg itare lahibareg. Itare Tahi eteyente malik ari embesin o ibagte He aren he at Tenus isinga hahon itnoen, Wanina hahon itnoente eleg, Malik ari embesemin fug, We ninim o ulugte Libag libag libag libag libag libag libag libag libag libag[4] Siplareg[5] punumu erekum libag ari.

Erekum libareg itare horiye ibaregte Suburu nibag. Malik itno ag og ipagte malik itno ita embesin o ulug ibag. Eleg o numalik nindi o, We ninim lul o ulugte we libag libag libag libag libag libag libag libag libag libagte Kalem ahakoma eremu libag. Eremuen itare Malik itnore horie ibareg itare It ikni isinga ibmanore suburu narukimte At itnore no Kirag anggolo segma itare Karog itno lisokore Ambibag ari.

Pilabegmane ibma amburuk eneg-enegte, Kirag itno we mutil libag. Yu Tenus hahon itnoente At we fu anggema famen at ekere Yu, We horog imi Sinaliag, We Sinaliag hahon ibmare. Itnoen itare it itno Katek ibag ari hun itno ibam fikit eteno. Larukim itare Tenus hahon itnore Kirag itno mutil libag mutil wapag itare Hup atuk lapagma itare. Yoho nisinga mel itno Wereg itno ulug lahik waharuk lapagte, eleg lapag ari. Elegmare itare eyu ulug on isap angge itnore e iratma itano supnifisibagma. Yu He itnore Waina hahon itnore Ahun Yalion itno inimte Ibam fikit ibmano libagma. Libagma itare Hinare itno itanoente Hom kop inimte Wam enu tor itano inim nibag ari.

Naruk eneg-enegte, ag humu tot asirahom ingga fam samorehon itano. Naruk eneg-enegte Isap anggema ying arik kibag ari, hik apagmare Ying arik kibareg itare. Hinare itno nohibag. Nohorukim itare we osit eke itnore nenhenon sibag ari hup anggo itnore. Osit itno anggolo roho sibagmare ap sabalon eke ibmare Misig we isapna ibmare anggolo roho sebatsibareg.

We anggolo roho sefibareg itare Yohore o siyalu anggolo roho sehek ari ulug Itare we Libag itno, isapnama ibma Laruk lapag ambebhen itare we Pak huhubi eke anggem silag milag ibma waregma Yaman ahun itno we ahiyeg anggolo hibag itno. Yiririk waririk, numpak ari watnasug ari. Itnoente Pak itno luhut sibag itno, Pamia eke itno luhut sibareg itare. Mel itno Huhubi itno Lek haruk lahi nikente Malik fu angge eke ibmano yinggig lapag.

Yinggigmu itare we hun itnoente mel ibag ari “mungkat hiyalug eleg hiyamin, Ap halug Wereg hiyamin[6]” ulugte ibag. Uruk eneg-enegte malik fu angge itno hilibag ari. Yu, Malik fu angge itno weregma itare Hilibareg itare Ar Yaman ahun itno ibam kibag ari malik fu itno inim. Yaman tohon itno ibam Kibareg itare we hun aren we Pak mel ibmano, on luhutukon ibmano We amloho itno eneg, Tenus hahon itno eneg isag utuk lapag. Isag utukmen isag utukmen itare we Imi itnore su su su su su su su We indi wereg-wereg ibamano su atuk lapag. Su atil larukim itare, ye…. namloho itnore Indag sarukonte indag saruk lahi ari ulug We ari roho eneg surukmen surukmen surukmen surukmen surukmen, Wam itno isag utuk, We malik itno su atuk, Wam eke itno isag utuk, Malik itno su atuk, We ari roho surukmen surukmen surukmen surukmen Itare we malik itno su apag ari. Su apagma itare, yu ulug itare we Eye namlohore indag saruk lahi at ari ulugte We wam ayeg fia eke wapag ari. Watuk eneg-eneg itare mel sibag itno, Amloho itno isag utuk eneg-enegte, Puon nitamu, hat te Wam ibma we narukmen-narukmente Su aruhunon ulugte isag ipag.

Isag ipagma itare Hinare itno wam narukmente we fahe, kabini anggolo lapag ari. Kabini anggolo apag ari, Yali fil etemare Mel o ulug ehesa ari. Etema we Wam uwo suhup o ulug, Ti anggolo roho suhup o ulug ibag. Ibagma itare we hinare itnore Itamu itno inimte, Tenus hahon itno inimte Puali Hundurehesa itno. Puali piren hundutuk eneg-eneg itere we Hinare sabal ahun itnoente, Itamu itnore anggolo roho ubam angge seg irehek itno. Puali werene, Werene el eke Puali piren hundupag, ari. Ibmanore obog angge ibmano wan irehektegte Erekum lamihintegte tia watmihin o ulug ehek. Pirenam hinahanam erekum lahareg si halug waharuk laha.

We fanik-fano o nitamu ulug ehek. Eke Ar itamu itno oho, Eke Tenus hahon itnoen oho wan irehek itno. Eya Puon, har oho fano anggolo o, Erekum lamihinteg si halug Tia watmihin o ulug ehek. We fano o nare o ulug ehek. Itnoen we lahakesa itno eteno. We laharuk lahasa ambehen itare we Ti itnore we embik laruk embik waharuk embik laruk embik waharuk surukmu hibil-hibil nonggol-nonggol surukmu.

Surukmure Tenus hahon itnoente ti eke ehek ari. Ti ehekteg itare Hinare itnore we Ti ibmano Surukmen warukmen Surukmen warukmen Surukmen warukmente O itno hup atuk lahama itare, Hinare itno ik obog-obog itare O itno winama kuruk lahi nikente He Wanina itno hahon ibam kehek ari Isinga wereg ambeg itno kehek. Kehekteg itare, Ti ehekon ibma Fahe ibma ehekon oho holehekteg.

Eye… an Malik arire anten embeseruk siyahon itnoen Ti ari ehek ano ulug itare Wanina hahon itnore indium siyahen suruk laha ari. Indimu siyahen surukmure Hinare itno fobik enegte ik obog ahamare Winama kuruk lahi nikente. Amloho Itnore Isinga itno wereg ambeg kehek ari.

[1] Nama tempat di mana penulis dibesarkan

[2] Nama anjing kesayangan mereka

[3] Nama tempat di bagian timur dari Masahangguli

[4] Pengulangan ganda

[5] Nama tempat

[6] Kalimat yang digunakan untuk memastikan kebenaran akan hal yang dianggap terjadi di luar dugaan